HaPpY BiRtH DaY

والله حركــــــــــــــــاات صرتي كبيـــره!!

كل سنــــــــه وانتي طيبه..

وعقبال 200 سنه.
Happy Birth day to you
((اناا اول وحده اقولك..صح؟)) << وحده مــره واثقه !! خخخ

باي الفراولة ..

اليوم رح احكي عن احدى افشل تجاربي الطبخية ..
بداية انا كان حلم حياتي انو اعمل باي زي اللي يجيبوها في توم وجيري.. طبعا هذي القصة لما كنت صغيرة
و مرة جا مع زبدة لورباك كتاب طبخ وفيه كان باي فراولة ..
فقلت لامي انو رح اعملها فقالت طيب
وبدات العمل وكنت جدا متحمسة .. او صح نسيت اقول انو كان رمضان ... و الجوع عمل عمايلة ..
بالنهاية الباي طلع زي اللي بالصورة .. مررة يجنن
وحطيته بالثلاجة
.. وبعد صلاة المغرب
جاء وقت العرض
تجمعت العائلة ك ل ه ا
والكل كان معجب لان شكلها مررة يشهي
واخذت امي السكينة ودخلتها

و
و
تطلع امي السكينة ما رضيت تطلع
وسحبت بقوة
واقوى
و
و
سحبت امي الباي من الصينية
يعني تخيلو امي في يدها سكينة ونهاية السكينة فيه باي
في السما
مررة تفشلت .. يعني الكيكة ناشبة
وقاسية .. زي الصخر
والكل يطالع فيه
ويضحك
من يومها ما عدت اتجرأ اعمل باي
مع انو نفسي اسويها بس توبة

عيد مبارك

عيد مبارك ومن العايدين الفايزين
كعادتنا اعياد الفطر تكون جدا ممتعة وتتجمع العائلة كلنا سوا لكن هذي السنة افراد كثير غابوا و توزعوا اللي بكندا واللي بدبي واللي بعمان واللي بالباحة .. و عشان كذا رح اكتب ايش سوينا بالزبط عشان نحس كنو كلنا سوا وماحد غاب ..:)

بداية صحينا ممكن الساعة خمسة او شيء زي كذا.. اكذب عليكم الحقيقة وكعادة الاغلبية من افراد العائلة واصلنا والساعة خمسة مرت امي علينا انو قومو تجهزوا ابوكم بيطلع للصلاة وبعدين لما يرجع رح نمشي.. احنا الحريم والبنات ما نطلع للصلاة نقعد نتجهز ونجهز الاطفال ونبخر البيت و نجهز قهوة وحلاوة العيد..و تقريبا على الساعة ستة وشوية رجع ابوية من صلاة العيد وتجمعنا كلنا بالصالة وشربنا قهوة و اكلنا حلاوة العيد ..

طبعا هذا العيد هو اول عيد لابن اخوية اللي يزنن بسم الله عليه مدين
المهم انطلقنا الى بيت عمو اللي نتجمع فيه كل عيد وتجمعنا الموجودين وافطرنا فطور العيد المعتاد ..
والساعة ممكن ثمانية بدانا بالهدايا..
الهدايا.. من يوم ما عرفت اني عضو في هذي العائلة واحنا عندنا هذا التقليد انو كل عيد فطر يقطو الاباء على عدد افراد عائلتهم ويتكفل واحد يشري هدايا بعددنا وتغلف الهدايا وينحط عليها ارقام وبالعيد كل واحد يسحب رقم ونفتح الهدايا ونشوف ايش اللي طلع له .. ساعات تكون هدية حلوة وساعات تكون سنيكرز حظك نصيبك..


السنة هذي تكفل بها محمد .. المهم تجمعنا في الغرفة اللي فيها جدو .. وقبل اي شيء
وقف محمد وطلب انتباه الجميع وقام ورفع ورقة معلقة على الجدار وقال هذولا اخواني صحيح هم مو موجودين معنا لكن كذا رح يكونوا معنا .. تحت الورقة كانت صورة لاولاد عمي الثلاثة مع بعض .. هذا اول عيد لهم بعيد عن العائلة وفي بلد الغربة .. كانت لحظة مؤثرة .. وحركة استحق فيها المديح من كل الموجودين ..
بدانا توزيع الارقام وكانو حاطينها في صناديق ومعها حلاوة التوفي ( حقت نهى ).. فكرة جديدة اعجبت الجميع.. المهم انا طلع رقمي 2
ويللا بدانا توزيع الهدايا .. جا دوري بسرعة بحكم انو رقمي اثنين و خفت من الحظ انو ما تطلع الهدية حلوة


هذيهي هديتي مو مرة عجبتي لكنها كويسة :( .. اهم شيء العلبة اللي كانت فيها الهدية " جراك الشعلة " لووول

بامكاني ان اعلن انو عائلتنا فرع ابوية حصلنا على احسن جوائز هذي السنة ..

انتهى توزيع الهدايا .. وخلصت الحفلة الصباحية والتريقة وبدأ توزيع العيديات..( وجه سعيد جدا جدا بيتشقق)
جدو هو اللي يوزع العيديات والطريقة هي الاتي .. يكون الجميع رجالا ونساء بالغرفة عددنا كل سنة تقريبا 36 بس هذي السنة بس20 :( .. اصلا هم موجودين عشان الهدايا ..الحريم في جه والرجال في جه.. وينادي علينا بالاسم واحد واحد ونقوم عنده وناخذ العيدية ونسلم على راسه .. البداية طبعا جدتي .. ثم عماتي .. ثم عائلة عائلة من الاكبر للاصغر ..
من غير الاباء او الشباب الموظفين ..

بعد كذا رحنا على البيوت ونمناااااااااااااااااااااااا..

على العصر قمت وتغديت مدري افطرت مرة ثانية .. بدانا التجهز عشان نروح استراحة عمو

اللي ما كنت ادري عن الاستراحة انو فيها 18 بسة ( قطة)..هاهاها كانت سهرة توتر وعذاب لاخواتي .. لانهم يخافون .. بس كانت مررة اشكالهم حلوة ..

وطرطعوا الاولاد و كانت حلوة الطراطيع( الطراطيع هي الالعاب النارية ) ..حسيت انها احلى من كل سنة ..

والله تمنينا الغايبين معنا وان شاء الله السنة الجاية نعوض غيابهم ..
واخر شي
من العايدين الفايزين و الله يعيده علينا وعليكم بالمسرات