الشنطة البيضاء

هذي الطنقارة كانت تراكمات عدد من الاحداث اللي صارت في اوقات مختلفة وعشان تسلل الاحداث لازم اذكرها بنفس ترتيبها

اول موقف
قررنا انا واختي انو نشتري عطر وبالمدرسة شميت عطرين مرة عجبوني وقررت اخذهم بالصدفة انو اختي كمان كانت تبغى تشتري زي واحد منهم لانه شمته عند صاحبتها وعجبها لما قلنا لبعض كل وحدة اصرت انها هي اللي تشتري العطر لنفسها .. اشتد الحوار واحتدم .. وكاغلب الحوارات العربية اللي ما منها فايدة .. اتفقنا ال نتفق.. وانو في المحل كل وحدة تحط الثانية تحت الامر الواقع..
::اسمعي انا باشتريه اذا تبغي تقلديني كيفك..
::انا قلت باشتريه اول يعني انت اللي قلدتي..
وكذا الين ما انتهت السالفه انو الاختين عندهم نفس العطر بالزبط
انا شخصيا ما كان يهمني انو انا واياها عندنا نفس الاشياء احس او بالاصح كنت احس انو عادي مش مهم
تمر السنون وتتوالى الاعوام وتنسى السالفة الاولى

ثاني موقف
كان الوقت صيف والناس داخلة على مناسبات وعزايم خصوصا انو هذيك الفترة خطوبة اخوية فكان لازم نلبق اطقم للسهرة وكذا .. نزلنا محل واتشرنا نقلب في اكوام الملابس كل واحد يلبق ويختار ويحوس .. اتوقع هبلنا في اللي يشتغلون هناك بس هذي وظيفتهم .. الموهم اني جمعت بلوزة وتنورة وبودي بالوان كانت مررة مناسبتني .. وحاطتهم على ذراعي ولساتني ادور كمان.. الا تجي اختي..نفس الاخت
:: سلمى عطيني اللي بيدك
:: هه.. خذي
وراحت .. انا دورت كمان زيادة وما حصلت شي.. فقلت خلاص يابنت امشي حاسبي . اروح ادور على اختي.. احصل امي
::شفتي فين سين ؟
:: راحت تحاسب..
:: ايش اخذت
:: طقم حلو انت ليه ما اخذت زي اختك شوفي دورت وحصلت

انا اشوف اختي جاية وانا في حالة ذهول تام .. اختي المصون حفظها الله وراعاها .. اخذت الطقم منن يدي وراحت عند امي وقالت ابغى اشتريه .. عيني عينك

انا اوتوماتيكيا وحتى ما هاوشت ولا علقت رحت اخذت نفس الطقم .. لكن الحمدلله بالوان مختلفة .. وانا مقهورة لانو هذيك هي الالوان اللي انا ابغاها .. عدت السالفة على خير .. ولبسنا وتكشخنا ..

او صح نسيت اللي عند اختي لبسته بس مرة وحدة لانو فجأة ..وبدون سابق انذار.. اكتشفنا عليه بقعة كلوركس ; )...سبحان الله يمهل ولا يهمل
تمر السنون وتتوالى الاعوام وننسى الموقف الثاني

الموقف الثالث وهو بيت القصيد
ندخل محل وتعجبب اختي ( ايوه نفسها) شنطة بيضاء حلوة .. وقالت لي شوفيها حلوه
:: ايوة حلوة
:: بس ما ادري اخذها ولا لا..
انا شفتها راحت نفس مكان الشنط وقلت يمكن راحت ترجعها .. وبعد شوية رحت مكان الشنط والجزم وعجبني صندل مرررة عالي ..مرتفع.. بالاصح ناطحة سحاب بيضاء فقلت لنفسي خلاص انا رح اخذ الصندل والشنطة وهم الاثنين لونهم ابيض.. وخلاص بدات الفكرة تاخذ عقلي لدرجة اني نسيت وممكن تناسيت انو اختي عجبتها الشنطة اول بس كنت احسب انها بطلت منها

المهم اخذت الشنطة ورحت عندهم وقلت باخذ الشنطة
:: لا .. اشبك؟ .. انا قلت عليها اول
:: طيب.. عادي.. مش مشكلة.. نلبس زي بعض ..
:: سلمىىىىىىىىىىىىىىىىى.. بلا استهبال ولحاجه انا باخذ الشنطة وانت استلفيها مني.. ( طبعا انا ما تمشي علي هذي الحركات لانها رح تحط فيها اغراضها واذا فيك خير طلعيها )
:: ما ابغى انا باخذ الشنطة وانت استلفيها مني ..و حتى انا لبقت معها صندل ابيض..
:: مالي دخل.... امي شوفي سلمى
الام:!@#$%&*%$#@!^&)()&&^%%$#@!!@$^&*)(+_)&^^%$#@!$$%!@وكمان جمجمة بس ما اعرف اسويها بالكمبيوتر

انا ركبني ابليس .. اعوذ بالله منه.. خصوصا اني لما حكيت لامي عن الموقف الثاني ما علقت كثير وما هددت ولا توعدت زي كذا


(اوو نسيت شيء .. في نفس اليوم كنت انا توني ماخذه المكافاة وكل ما دخلنا محل وقلنا على شيء الله حلو قلت انا باخذه.. وحصل كم من موقف بس انا ما ركزت اني صايرة كذا )

نعود الى ابليس.. الشنطة باشتريها يعني باشتريها.. علي وعلى اعدائي..

وبالفعل

للمرة الثالثة ..انا واختي نشتري نفس الشيء .. بس الفرق هذي المرة انو هي اللي اختارت اول وانا اللي قلدتها.. لا انا ما قلدتها وانما استوحيت منها..

طنقرت الاخت .. ما تبغى تمشي ولا تبغى تقعد ولا تبغى تتكلم ولا تسكت.. خخخخخخ

جاء الوالد العزيز وركبا في السيارة الرائعة بس سكرنا الابواب ولساتوه قاعد يحرك السيارة
:: اصلا انت دايما كذا تحبين تنكدييييييييين وااااااااااااااااااااااا اهئ اهئ اااااااااااااااااا

قامت تبكي باعلى ملكات صوتها وارتفعت طبقات .. ابويه مهو داري ايش السالفة وعلى البكاء هذا حسب انو تضاربنا .. سوينا فضيحة في السوق
:: ايش فيه ايش اللي صار؟؟
:: ابوووووووووية اهئ اهئ ا الشطنة .ز كلما مسكت شيء اخذته..زاهئ اهئ .. وييييييييييهئ هئ هئ
ابوية لساتو مهو داري ايش السالفة وانا طنقرت يعني شوفو كيف لفت السالفة انو انا اللي غلطانة
طيب ما اكثر من مرة اخذنا زي بعض وما احد زعل اشمعنى هذي المرة ولا عشان هي اللي اختارت اول يصير بكى ودموع واتهزأ ولما انا اختار وتاخذ زيي عادي..
امي شرحت القصة للاب العزيز

ابوية مسكين:: سلمى انا باشتري منك الشنطة
:: لا ما ابغى ااااااااااااااااا اهئ اهئ اهئ
وانا كمان صرت ابكي .. معاي حق لاني كنت مررة مقهورة
:: طيب هي دايما تسوي كذا وما ازعل اشمعنىااااااااا اهئ اهئ..
ابويه وامي انفجعوا .. ابنات يبكون على ايش؟؟ .. مين اللي غلطان؟؟ ..ما هم داريين
:: سلمى رح اشتري منك الشنطة بضعف السعر
:: اهئ اهئ مااا ابغىىىىىى ..
وطول الطريق واحنا نلت ونعجن في السالفة الين ما كل اللي في السيارة طنقروا بعدين قامت اختي الثالثة .. اللي مالها دخل في العير ولا البعير ماادري شطلبت ..وجات على راسهااا
!@#%$%$#@ّ!*&^$%^&#!@ّ@#$%^)*ًٌٌَُ%^$#!
قامت الثالثة تبكي و صارت السيارة تموج بالدموع ..
طبعا احنا ما تهزأنا لاننا كنا اصلا نبكي
اضحك شي اننا كنا رايحين بيت عمي .. ولما وصلنا عندهم دخلنا خشومنا منفخة وعيوننا حمراا من جد كان يفشل وكان جدا واضح اننا كنا نبكي والحلو انو استقبلونا وتغاضوا عن الموضوع ولا سالو شفيكم ما فيكم .. او اي تعليق من اي نوع .. احبهم(قلب وفيه سبعة اسهم هه)

ومن يومها ما عاد شرينا زي بعض ابداا..
... الى الان كل مررة البس الشنطة ابويه يقول لي ..
:: سلمى لا تلبسين هذي الشنطة ما تناسبك..
:: اشمعنى تناسب سين؟؟
:: تناسبها ...بس انتي ما تناسب جسمك..
باقي ان تعرفو انو ابويه ما قد علق على ملابسنا وايش اللي يناسب من اللي لأ ( وجها لوجه )